download disini =>OLob-olob Keluarga 2017

TATA IBADAH

PARTONGGOAN OLOB-OLOB KELUARGA GKPS 2017

Tema:

“Ibohali Manghobaskon Horja Namadear” (2 Timoteus 3:17)

Sub Tema:

“Ajari ma Kuria in gabe Sipangidangi ibagas hapentaron, haporsayaon ampa bulus ni uhur ase lambin torsa kuria in na mampangkorhon hadoharon pakon hadearon i tongah-tongah ni Gareja, Masyarakat ampa Negara” (2 Petrus 1:5; Epesus 4:13-15)

  1. Mandoding Haleluya No. 1: 1, 2, 6

Jahowa sihol pujionku, ai Ham do Naibata sitompa au

Sai suruh Tonduy-Mu hubangku, mangajar au mamuji goran-Mu

Marhiteihitei Jesus AnakMu, ase dear dodingku hu Bamu

 

Bai Anak-Mu bobahon ahu ase Bamu iboban au homa.

Sorapkon Tonduy-Mu hubangku, manogu au bai dalan na torsa

Ase tongtong gok damei uhurhin, janah mesek mamuji Goran-Mu.

 

Sonin ma au marolob-olob, marhamegahon malas uhurhin.

Ai ra do Ham mamparuhurhon, na husuhutkon hu Bamu ijin.

Pasu-pasu-Mu sai sirnip do in, lobih humbani panagamankin.

 

  1. Salam Pamungkah

P       Horas.

Salam Olob-olob ma hubanta i rumah on.

Patut do hita marmalas ni uhur sadari on mardingat pardas ni Ambilan Namadear in hu tanoh Simalungun 114 tahun na salpu. Halani ai pasir-sir hita ma dirinta manombah Tuhanta.

K       Selamat Olob-olob ma tongon. Tarpuji ma Tuhan na dob mandilo hita marhitei Ambilan Na Madear in.

 

  1. Votum – Introitus – Tonggo

P       Ipungkah hita ma ibadah olob-olob Keluarga on, ibagas Goran ni Naibata Bapa, pakon Anak-Ni Tuhan Jesus Kristus ampa Tonduy Napansing, sitompa langit pakon tanoh on.

P.K    Amen

K       Marolob-olob do uhurhu pakon dagingku manjumpahkon Naibata na manggoluh in.

P       Martuah do halak na marhagogohon ibagas Jahowa, na marugas i rumah-Ni.

K       Lambin ganda do gogohnami i lobei-Mu Ham, Naibatanami.

P       Dearan do sadari rapkon Jahowa ase saribu ari rapkon na legan.

K       Ai Mataniari ampa Gantar do Naibata Jahowa.

P       Ia do sibere idopni uhur ampa hasangapon, seng iampogi na madear bani halak na bujur marparlahou.

K       Maidop ma uhurMu bannami ale Jahowa, maidop ma uhur-Mu.

P       Martonggo ma hita:

Ham Tuhan Naibata na marhabangsa i nagori atas, ibagas malas uhur do hanami on, marhasadaon mardingat na dob 114 tahun Ambilan Namadear ondos i tanoh Simalungun. Domma buei ijalo hanami pasu-pasu pakon hadearon na pinaondos-Mu. Ajari Ham ma hanami marhitei Tonduy Napansing ase tongtong hanami mardalan domu hubani Hata-Mu na manggoluh anjaha na marhagogohon in. Pargogohi Ham ma homa hanami ase lambin marhatalupon hanami marolob-olob, ase lambin marmalas ni uhur homa tonduy ampa pamatangnami laho mamuji pakon pasangapkon goran-Mu na Pansing in. Ajari Ham ma hanami ase lambin marondos huba-Mu. Balosi Ham ma hanami  rap ampa tonggo elek elek nami. Amen

 

  1. Mandoding Haleluya No. 349: 1+3

Goran Jesus sai marsora bai ganup dunia on

Goran Jesus pasonangkon ganup na marhoru in

Goran in marpasu-pasu bai ganup pardousa in

Haganupan do idilo bani gomgoman-Ni in

Goran Jesus sijengesan lao paborsih uhurhin

Martarimakasih ahu ibaen na itobus au

 

Goran Jesus marsinondang seng boi horlom sondang-Ni in

Goran Jesus paliharhon na ihagolapan in

Golap pe matani ari, hassur pe dunia on

Goran Jesus marsinondang sadokah-dokah ni in

Goran Jesus sijengesan, lao paborsih uhurhin

Martarimakasih ahu ibaen na itobus au

 

  1. Responsoria Pangakuan Halani Panramotion ni Tuhan.

P       Ambit lang Jahowa na mangkasomani hita, sonai ma patut hatahononta.

K       Ambit lang Jahowa na mangkasomani hita, sisoya-soya do ganup horjanta.

P       Sonai ma patut hita martarimakasih, ai tongon marhiteihon-Si do ase boi gabe pasu-pasu hita bani ganup goluhta.

K       Ibere do hajorgiton ronsi gogoh hubanta laho mamparuhurhon sagala  harosuh-Ni.

P       Martuah do halak na mangindahi janah mardalan bani harosuh ni Jahowa, ai manumpak hu hadearon do goluh ni sidea.

K       Martuah ma hita anggo Jahowa  gabe pangajaman bani ganup goluhta.

P       Tarimakasih ma hu Bamu Tuhan, halani pangkasomanion- Mu bennami itongah-tongah ni keluarganami.

K       Useihon Ham ma pasu-pasu-Mu ase boi marbuah na madear hanami

P       Holong-Mu do na pataluphon hanami gabe pagori i KuriaMu.

K       Holong-Mu do na mampargogohi hanami manggoluh selaku keluarga Kristen na hinarosuhkon-Mu.

P.K    Amen

 

  1. Mandoding Haleluya No. 386: 1, 2, 4

Age pe sungkod mata manonggor

Seng anjai sungkod holong ni Tuhanta

Seng ipaturut hita on tarbador

Asal tangihon HataNi in

 

Ai anggo domma orod pakon Si,

holong Ni in sai tong mangkasomani.

Tenger uhurta bai pangurupi-Ni,

Asal tangihon hata-Ni in.

 

Pongkut martonggo, ungkab uhurmu

Sai jalo Jesus baen batar-batarMu

Na paluahkon ronsi na marmudu

Asal tangihon HataNi in.

 

 

  1. Renungan

“Ase gokan dear siminik ni Naibata, mangasup bani sagala horja na madear.”  (2 Timoteus 3:17)

 

Salam Olob-olob ma hubanta haganupan!

Pardasni Ambilan Na Madear i tanoh Simalungun, domma mamboan buei hamajuon i tongah-tongah ni halak Simalungun, misalni pendidikan, kesehatan ampa peningkatan ekonomi. Boi hatahonon ija adong gareja ijai do homa jumpah hagoluhan na lambin dear. On mambuktihon bahasa Ambilan Na Madear totap do mamboan hadearon tarmasuk sumberdaya manusia na lambin maningkat. Lambin bayak do homa pangarusion ni halak Simalungun; na lang mambotoh mambasa hinan gabe boi mambasa, humbani na marjuma nomaden (marpindah-pindah) gabe mambotoh mengolah juma lang pala marpindah-pindah, humbani haporsayaon bani begu-begu marhaporsayaon na sintong hubani Tuhan Jesus, sonai pakon hamajuon-hamajuon na legan pe tene. Domu hujai sadar atap lang sadar lambin tarbohali do halak Simalungun bani bagei-bagei bidang hinorhonni Ambilan Na Madear in.

 

In do homa na sinobut ni Paulus hubani Timoteus panorang ijia, Ambilan Na Madear na binoban ni si parambilan buei tumang do pangkorhonni, ai nini do: Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoran (ay.16). Ipodahi Hata ni Tuhan in do hita bani haganupan sihorjahononta, ipinsang do hita bani sagala horja na so madear, ipauli-uli do na dob maseda anjaha itogu do homa na kahou ase jumpahan hagoluhan. Haganupan in pataridahkon bahasa Hata-Ni Tuhan in mandoudou haganup aspek, sedo pitah kecerdasan spritual (partonduyon) tapi dihut do kecerdasan emosional ampa kecerdasan intelektual.

 

Hata-Ni Tuhan do bohalta ase tarhorjahon hita sagala na madear. Hata-Ni Tuhan do bohalta ase tarpakeihon hita sagala habotohonta (hapentaran) bahen hadearon. Hata-Ni Tuhan do bohalta ase tarpakeihon hita hinadonganta hu bani sagala na madear. Bani na marolob-olob hita pa 114 tahunkon panorang on, tontu on do homa sitoruskononta ibagas hagoluhanta. Totap ma ibohali hita dirinta bani Hata-Ni Tuhanta. Anggo domma tarbohali hita bani Hata-Ni, lang tarbahen lang tarhorjahon hita do sagala na madear. Haganupan in, nini Paulus, ase gokan dear siminik ni Naibata, mangasup bani sagala horja na madear.

 

Adong dua pahara na porlu gabe malas uhur banta marhitei renungan on:

 

Na parlobei, semangat olob-olobta Tahun on siholma semangat na mangkasiholhon Hata-Ni Tuhan na lang boi ganggang humbani pargoluhonta. Halani ai, roh ma hita hubani Tuhanta. Ia do harorohni malasni uhur banta. Lang adong na legan na boi mambere malas ni uhur banta leganni Ia na manghaholongi hita, aima Kristus Jesus Tuhanta in. Ai pori adong pe hasonangan na binerehkon ni dunia on, parsatongkinan do ai. Pindahi hita ma Hata-Ni bani haganupan langkahta na gabe bohal banta mandompakhon pardalanan ni goluhta.

 

Na paduahon, Hata-Ni Tuhan na jinalonta, in do mambahen hita mangasup laho mengoreksi pardalanan ni goluhta na sain dokah. Lang tarbahen lang, sipata ra do hita madabuh bani parlajouan, taruyun bani horja na hurang dear. Hata ni Tuhan in do na boi pasingatkon hita bani haganupan na lepak na ihorjahon hita. Hata-Ni tumang do homa memperlengkapi hita manlawan sagala na hurang dear.

Sai totap ma maringanan Hata-ni Tuhan in ibagas goluhta ari-ari! Amen

 

  1. Mandoding Haleluya No. 340: 1, 2, 4

(Patumpu galangan olob-olob Keluarga)

 

Huondoskon bani Jesus haganupan diringkon

Ia do pasangaponku sadokah bai goluhkon

Huondoskon ma, huondoskon ma

Bani Jesus Sipaluah, huondoskon ma.

Huondoskon bani Jesus haganupan goluhkon.

Hutadingkon ganup dousa, huihutkon Tuhan in.

Huondoskon ma, huondoskon ma.

Bani Jesus Sipaluah, huondoskon ma

 

Huondoskon bani Jesus haganupan gogohkin

Holong pakon kuasaNi, in ma manramotkon au

Huondoskon ma, hu ondoskon ma

Bani Jesus Sipaluah, hu ndoskon ma.

 

  1. Tonggo safaat – Tonggo Panutup – Pasu-pasu.

 

Sitonggohonon:

  • Haganup Parhorja ni Kuria (Pandita, Penginjil, Sintua, Syamas, Pengurus Seksi, Guru-guru Sekolah Minggu) ase lambin margogoh laho mangambilankon Ambilan Na
  • Pagori ni Kuria GKPS, ase lambin matoras haporsayaonni.
  • Situasi ni Negara ampa Bangsanta, ase semakin lambin bertumbuh ibagas jati diri na sintong, ase terbina toleransi, antar umat beragama, terbina homa kesetiakawanan sosial antara sesama anak bangsa…. Amen

 

P       Riap ma hita martonggo marhitei tonggo na niajarhon ni Tuhan Jesus hu banta.

PK     Ham Bapanami na i nagori atas. Sai napapansing ma goran-Mu! Sai roh ma harajaon-Mu. Sai saud ma harosuh ni uhur-Mu i nagori tongah on songon na i nagoni atas! Bere Ham ma bannami sadari on hagoluhan ari-ari. Sasap Ham ma dousanami songon panasap nami bani dousa ni hasoman na mardousa dompak hanami! Ulang hanami bobai Ham hu parlajouan! Paluah Ham ma hanami hun bani pangagou!Ai Ham do simada harajaon, pakon hagogohon ampa hasangapon sadokah ni dokahni. Amen

 

P       Pinuji ma Naibata Bapa, Anak ampa Tonduy Na Pansing.

K       Tarpuji ma Tuhan Naibata ronsi sadokahni-dokahni.

P       Jalo hita ma pasu-pasu humbani Tuhan Naibata :

“Idopni uhurni Tuhanta Jesus Kristus, pakon holong ni ateini Naibata  Bapa, ampa parsaoran ni Tonduy Na Pansing ma mangkasomani hita haganup”. Amen.

 


Artikel Lainnya:

Category: Tata Ibadah