DOWNLOAD DISINI=>Minggu Hari Bumi 2018

TATA IBADAH HARI BUMI SEDUNIA

Minggu, 22 April 2018

Tema:

“Ibohali Manghobaskon Horja na Madear” (2 Timoteus 3: 17)

Subtema:

“Bobai ma kuria in gabe paridop ni uhur songon Kristus paridop ni uhur in tarlobih hubani halak na musil , na marsitaronon pakon  na ibagas odoh-odoh (Jeremia 29:7; Lukas 4:18-19)

  1. Praeludium

Tanoh na tinompa ni Naibata… jenges, tunggung janah jagiah. Dear do haganup ipatotap domu hubani hajongjonganni. Inggou ni manuk-manuk pakon sora ni bah mardalan pe pajengeskon harangan na maratah in. Sinalsal hun hapoltakan mambuha ari ronsi manorapi haganup na marhosah i atas tanoh on. Musim pe sai margantih pataridahkon panramotion ni Tuhan in. Ale sagala na  marhosah, puji hita ma Tuhanta na dob patotapkon hita mangiankon tanoh on.

Prosesi

(mandodingkon Haleluya No. 399: 1-2)

Tubuhan poyon–poyon i tongah juma in

Manggargar manuk manuk bai parasarannin

Marbagei pakon ihan i bagas laut in

Ge tinompa na legan seng targorani in

Ganupan iparmudu Tuhanta Naibata

Lobihan iparmudu ganupan hita da

Sonai ge halayakon ibere do homa

Talup hatahononta diatei tupa ma

 

Ibere do panondang mataniari in

Bulan ampakon bintang panondang borngin in

Udan logou ni ari pagantih soluk in

Sonin ma ganup tingki  pajagar tanoh in

Ganupan iparmudu Tuhanta Naibata

Lobihan iparmudu ganupan hita da

Sonai ge halayakon ibere do homa

Talup hatahononta diatei tupa ma

 

 

 

  1. KEBAKTIAN
  2. VotumIntroitusTonggo
  3. P. Riap ma hita jongjong!

Ibagas goran ni Naibata Bapa pakon Tuhan Jesus Kristus ampa Tonduy Napansing, sitompa langit pakon tanoh on. Amen

Puji ma Jahowa, ale tonduyhu! Ham Jahowa Naibatangku, banggal tumang do Ham, hasangapon pakon hamuliaon do pakeian Bamu

  1. Haliharon do isabingkon Ham Bamu songon salimut, ipaherbang Ham do langit songon tenda
  2. Ibahen Ham do loteng-Mu ibabou ni bah, hombun do ibahen Ham garetaMu, anjaha mardalan-dalan do Ham iatas ni habong ni logou
  3. Ibahen Ham do logou gabe suruhan-Mu, apuy na marjirlam-jirlam gabe siparugas-Mu
  4. Domma ipajonam Ham tanoh on bani palasni, seng anjai dugur be sadokah ni dokahni
  5. Bah bagas na hampar do manrungkubsi, tinob do sagala dolog ibahen bah.
  6. Maporus do ai ibahen pangasupi-Mu, tarolos do sidea lintun ibahen sora ni longgur-Mu
  7. Gabe timbul ma dolog, matornoh lombang bani ianan na dob tinotapkon-Mu bani sidea.
  8. Domma itotapkon Ham parbolatan bani bah na so malo lopusanni, seng anjai rungkubonni be tanoh
  9. Haleluya, Haleluya, Haleluya.
  10. (Mandodingkon) Haleluya, Haleluya, Haleluya
  11. Martonggo ma hita!

Ham Tuhan Naibata simada tanoh on. Roh do nuan hanami martarimakasih hu lobei-lobei-Mu, mamuji janah pasangapkon Ham. Ham do na manramotkon tanoh gabe siiankononnami. Bere Ham ma uhur na pentar bannami laho mangarusi sura-sura-Mu ase tongtong tubuh tanggung jawab nami manramotkon na tinompa-Mu in. Ham ale Tuhan, sai pujion ni gok tanoh on ma goran-Mu ronsi sadokahni dokahni.

  1. Amen

 

  1. Mandoding Haleluya No. 406: 1-2

Hatahononta diatei tupa ma, ai Negaranta tanoh na lambut

Laut bolag dologni pe ratah, talun jenges ampar do haganup

In haganupan pasu-pasu-Ni, simada kuasa Tuhan Naibata

In haganupan pasu-pasu-Ni , simada kuasa Tuhan Naibata

 

Sanggah poltak mataniari in, martitialas bai sogodni in,

Morum mangerbang bunga-bunga in, irandu doding ni bossala in

In haganupan pasu-pasu-Ni, simada kuasa Tuhan Naibata
In haganupan pasu-pasu-Ni , simada kuasa Tuhan Naibata

 

  1. TONGGO HASASAPAN NI DOUSA    (jongjong kuria)
  2. P. Hata ni Tuhanta pasal hadosaonni jolma:

“Ai pardagingon do iparuhurhon na mangihutkon daging, tapi partonduyon do iparuhurhon na mangihutkon Tonduy in. Ai hamateian do hauhuron ni daging, tapi hauhuron ni Tonduy aima hagoluhan ampa hadameion. Ia hauhuron ni daging aima hamunsuhon dompak Naibata; seng ra tunduk in bani titah ni Naibata, ai seng tarbahensi. Halak na ibagas daging seng tarbahensi pamalas uhur ni Naibata”.

  1. Ham ale Tuhan, mangaku do hanami i lobei-lobei-Mu, pardousa banggal do hanami
  2. (mandodingkon) “Holong ma Ham”

 

 

  1. Sondahan on ibolus hanami do kondisi cuaca na ekstrim, mohop na lobih sonai ampakon borgoh. Logou ampa udan na marambolas parohkon biar. Bencana alam marnunut do masa i sab tanoh on janah mangancam goluh ni jolma. Haganupan in talup pataridahkon pandoruh ni tanoh on.
  2. Ham ale Tuhan, pardimata Ham ma hanami jolma pardousa on
  3. (mandodingkon) “Holong ma Ham”
  4. Idilo Ham do hanami ase tongtong manramotkon sagala na adong i tanoh on, tapi hurang ope kesadarannami pasal hemat energi listrik, polusi udara ronsi bah na marambur-ambur. Gati ope hurang ipardiatei hanami suan-suanan na isuan hanami bani pot, horah janah matei halani hurangan bah. Talup do gilaan-Mu hanami halani hahurangannnami in.
  5. Ham ale Tuhan, pardimata Ham ma hanami jolma pardousa on
  6. (mandodingkon) “Holong ma Ham”
  7. Hatani Naibata hubanta domu hubani pangakuanta bani ganup hahurangan pakon dousanta: “Berehonon-Ku do bannima uhur na bayu, anjaha tonduy na bayu do nahkonon hubagas dirinima; buaton-Ku do uhur batu humbagas angkulanima, anjaha uhur na marpangahapan do berehonon-Ku bannima. Tonduyhu do nahkonon-Ku hubagas dirinima, anjaha bahenon-Ku do ase marparlahou hanima ibagas titah-Ku, anjaha bujur idalankon hanima aturan-Ku”. Hasangapon ma bani Naibata i babou.
  8. Amen

 

  1. Mandoding Haleluya No. 115 :1-3

Sadokah ho i tanoh on papintor uhurmin

Padingat-dingat ma tongtong nidok ni Tuhanmin

 

Sai songon hayu dear ho ramos parbuahniin

Bulung ni pe tabun homa usihi ma sonin

 

Buei do hadearon ni bah tubuh in tongtong

Pausih dirimin hujin baen uhurmin sintong.

 

  1. Renungan Situasional: Sorani Tanoh on (ibasahon piga-piga halak)

Hayu (Pohon):   Mamungkah humbani na itompa tanoh on, jongjong do hayu janah uratni manatang tanoh on. Ijaga do keseimbangan ni bah ibagas tanoh ronsi bulungni padaratkon oksigen  bahen keberlangsunganni pargoluhan. Tapi nuan, bahat ma hayu na dob iroboh bahen haporluan ni na mangiankon tanoh on. Masabur do iluh ni tanoh on tikki iroboh buei hayu na banggal. Lambin gabur mando tanoh on halani lang be urat ni hayu na gabe sipanatang. Ham ale Tuhan ramotkon Ham ma tanoh on.

Batu:                    Itompa Naibata do batu bani lapisan ni tanoh on laho patoguhkon tanoh na horah humbani bah  na i laut.  Kandungan batu na ibagas tanoh on do manatang daratan ase ulang masursur janah matolbak.  Tapi nuan on ihurak do tanoh on janah ipadarat do buei kandungan batu pakon logam bahen bagei haporluan. Eksploitasi mengatas-namahon kepentingan mambahen maseda hinadear ni tanoh na tinompa in. Ham ale Tuhan, ramotkon Ham ma tanoh on.

Tanoh:                 Ibahen Naibata do tanoh na gabe harorohan ni pasu-pasu laho patubuhkon suan-suanan bahen keberlangsungan ni goluh ni jolma. Ipatubuh tanoh in do hayu na marbuah bahen haporluan ni manuk-manuk pakon binatang na i harangan. Tapi nuan, tanoh pe domma imanfaatkon parohkon kesejahteraan bani jolma. Ham o Tuhan ramotkon Ham ma tanoh on.

Perenungan:       Hari Bumi iperingati tiap tanggal 22 April, na ipungkah sahalak aktivis lingkungan na margoran John McConnel mamungkah humbani tahun 1970. Tujuan ni Hari Bumi aima laho paingatkon jolma na i tanoh on ase mamingkirhon keberlangsungan ni tanoh on.  Domu hubani catatan ni sejarah,  meningkat do kegiatan na berakibat bani hasedaon ni tanoh on na isobut eksploitasi. Porlu ibotoh hita, lang pitah hita pangian ni tanoh on tapi dihut do generasinta magira. Mintor manaron ma sidea halani hisap-hisap ni goluhta sondahan on? Ham o Tuhan ramotkon Ham ma tanoh on. Amen

Cat. Dear anggo idukung alat peraga atap pe ilustrasi video

 

 

 

 

 

  1. Mandoding: Hal No. 191:1-4

Megah-megah hape langit ampa bunga-bunga pe,

nin homa do manuk-manuk, Naibata ipuji bei.

 

’Ge harangan pakon dolog sai marratah-ratah bei,

Ganup jolma pe marolob, Naibata ipuji bei.

 

Manuk-manuk na tarhurung bai borgoh ni ari in,

Gatian sonin tarhurung jolma i rumah ni in.

 

Laho hita rap mardalan hu jumanta, sabah pe,

Pardiatei na sinuan marmalas ni uhur bei.

 

  1. Manaksihon Haporsayaon (Model A)

 

  1. Acara Khusus :
  • Mambasa Tonah ni Pimpinan Pusat GKPS
  • Mambasa Puisi: “Hatunggungonni Naibata” (4 halak pambasa)
  • Tonggo Syafaat

 

  1. Mandoding Haleluya No. 468: 1-3

Jenges ni in ganup na tinompa, na jinadihon ni Naibatanta i dunia on

Ibahen marmusim panorang, milas, udan ari marsuan, i dunia on

 

Sirsir do ijadihon panondang, mataniari ampakon bulan, bai goluhta on.

Jenges do ganupan itompa, jimot do homa ipatorsa, bai goluhta on.

 

Manggargar do pinahan i harang, sonai age binatang i talun, iparmahan Ham. Maratah do dolog harangan, bah tubuh torsa do mardalan, iramotkon Ham.   10. Ambilan:  

  1. Galangan (Model A)

Mandoding: “Terima Kasih Seribu” (Erkata Bedil)  

       (irik patumpu galangan)

 

Surya bersinar udara segar, terima kasih

Di tepi pantai ombak berderai, terima kasih

Reff.  Terima kasih seribu oh terima kasih seribu

pada Tuhan Allahku oh pada Tuhan Allahku

Aku bahagia karena dicinta, terima kasih

 

Melati wangi ketilang nyanyi terima kasih

Serimba raya dengungkan lagu, terima kasih

Reff:

 

Panjatkan doa setinggi surga, terima kasih

Sepanjang masa terucap kata terima kasih

Reff.

 

  1. Tonggo Galangan – PanutupPasuPasu
  2. Riap ma hita jongjong!

Martonggo ma hita manggodoskon galanganta hubani Tuhan Naibata. Ham Tuhan Naibata simada ganup na tinompa, tarimakasih ma Bamu halani totap ope iramotkon Ham pargoluhannami. Roh do nuan hanami hu lobei-lobei-Mu mambobankon dirinami marhitei galangan tanda malas ni ni uhurnami. Jalo Ham ma galangannami on baen haporluan ni horja pangidangion i kuria-Mu. Paahapkon Ham ma tongtong bannami banggalni panobusion-Mu marhitei silang na gabe galangan sibanggalan baen tobusnami. Ajari Ham ma hanami ase sirsir hanami mambaen goluhnami gabe saksi Bamu janah siboan barita haluahon in. Ibagas goran ni Tuhan Jesus Kristus ipadas hanami tonggonami. Amen.

 

  1. (Mandodingkon) “Galangan” G = Do

 

 

  1. Ham Tuhan Naibata, bere Ham ma bannami uhur na bayu laho mangidangi Ham. Pakei Ham ma hanami gabe tangan-Mu laho manramotkon ganup na tinompa in laho paulihon pakon patorsahon ganup na dob maseda, ase marhitei hanami lambin talar hamuliaon-Mu i tanoh on.
  2. Hanami ma gabe saksi marhitei pambahenannami laho pataridahkon hinajenges ni hasadaon pakon ganup na tinompa in.
  3. Ham Bapa nami na i nagori atas…..
  4. (mandodingkon) Ai Ham do simada harajaon… pst Amen
  5. Jalo Ham/ hita ma pasu-pasu humbani Tuhan Naibata…. Amen
  6. (mandodingkon) Amen – Amen – Amen

 

Postludium

(mandodingkon): “Syalom” C = do

 

PUISI BERANTAI:

HATUNGGUNGONNI NAIBATA

(Psalmen 104)

 

Puji ma Jahowa, ale tonduyhu!

Ham Jahowa Naibatangku, banggal tumang do Ham,

hasangapon pakon hamuliaon do pakeian Bamu.

 

Haliharon do isabingkon Ham Bamu songon salimut,

ipaherbang Ham do langit songon tenda

 

Ibahen Ham do lotengmu i babou ni bah, hombun do ibahen Ham garetamu, anjaha mardalan-dalan do Ham iatas ni habong ni logou.

 

Ibahen Ham do logou gabe suruhan-Mu, apuy na marjirlam-jirlam gabe siparugas-Mu.  Domma ipajonam Ham tanoh on bani palasni, seng anjai dugur be sadokah ni dokahni.

 

Bah bagas na ampar do manrungkubsi, tinob do sagala dolog ibahen bah.

Maporus do ai ibahen pangasupi-Mu, tarolos do sidea lintun ibahen sora ni longgur-Mu;

gabe timbul ma dolog, matornoh lombang bani ianan na dob tinotapkon-Mu bani sidea.

 

Domma itotapkon Ham parbolatan bani bah na so malo lopusanni,

seng anjai rungkubonni be tanoh.

 

Ham do na patubuh bah tubuh i lombang-lombang, na mambahen mabaor bahni iholang-holang ni dolog-dolog, na mambere minum sagala binatang na i talun, anjaha halode jalang sombuh horahni ijai; marasari do i topini manuk-manuk na i awang-awang, na patangarhon dodingni hun ranting-ranting.

 

Ham do na painum dolog humbani loteng-Mu, anjaha bosur do tanoh on marhitei hombun-Mu.

 

Ham do patubuhkon poyon-poyon bani pinahan, ampa suan-suanan sihorjahonon ni jolma,

 

mambahen mandarat ruti humbagas tanoh,

 

ampa anggur laho pamalas uhur ni jolma,

 

pakon minak na mambahen marminak bohi pakon ruti na pagogohkon uhur ni jolma.

 

Bosur do ganup hayu ni Jahowa, hayu ares na i Libanon, na sinuanni ai; ijai do marasari manuk-manuk, tandaulog marjabu bani tusam.

 

Dolog na gijang do ianan bani bedar, anjaha dolog batu haporusan bani sorigala.

Ham do mambahen bulan laho manotapkon panorang, mata ni ari ibotoh do ianan hasundutanni.

 

Iodongkon Ham do na golap jadi tubuh ma borngin, ai ma panorang mandarat sagala binatang harangan.

 

Singa ajar-ajar maraum mangindahi sisorohon, ipangindo sipanganonni humbani Naibata.

 

Anggo poltak ma mata ni ari, mulak bei ma sidea, manggompang ibagas liangni.

Haluar ma jolma manohu horjani, mandalankon lahoanni ronsi bod ari.

 

Buei tumang do jadi-jadian-Mu, Ham Jahowa, haganupan in ipauli Ham marhitei hapentaran, gok do tanoh on bani na tinompa-Mu.

 

Tonggor ma, laut na banggal anjaha na bolag tumang, ijai do gumayom, seng habilangan, binatang-binatang na etek age na banggal. Ijai do manjuluri binatang laut na majombut, sonai age Leviatan na jinadihonmu, marguro-guro do ijai.

 

Haganup, Bamu do marpangarapan, ase ibere Ham sipanganonni bei bani panorangni.

 

Anggo ibere Ham bani sidea, boi ma sidea patumpuhon; anggo ibuha Ham tangan-Mu, bosur ma sidea bani na madear.

 

Anggo iponopkon Ham bohi-Mu, tarsonggot ma sidea;

 

anggo ibuat Ham hosahni, matei ma sidea, mulak bani orbukni hinan.

 

Anggo itongos Ham Tonduy-Mu, tartompa ma sidea, anjaha bayu ma rupa ni tanoh on ibahen Ham.

 

Ronsi sadokah ni dokahni do hamuliaon ni Jahowa, malas do uhur ni Jahowa mangidah jadi-jadian-Ni.

 

Mangkawah Ia bani tanoh on gabe dugur ma, ijamah dolog gabe martimus ma.

 

Sai dodingkononku do Jahowa sadokah goluhku, sai dodingkononku do Naibatangku sadokah dong ahu.

 

Sai marosuh ma Ia bani dodingku, marmalas ni uhur do anggo ahu ibagas Jahowa.

Sai bois ma sagala pardousa hun tanoh on, anjaha ulang be dong halak parjahat.

Puji ma, Jahowa ale tonduyhu! Haleluya!


Artikel Lainnya:

Category: Tata Ibadah