Download disini=> TATA IBADAH HUT PEMUDA GKPS 2017

TATA IBADAH HUT PEMUDA GKPS KE-64

(Natal Tuntunan)

 Rabu, 26 Desember 2017

 Tema :

“Ibohali Manghobaskon Horja Namadear”

Sub Tema :

Ajari ma Kuria in Gabe Sipangidangi Ibagas Hapentaron, Haporsayaon ampa Bulus ni Uhur Ase Lambin Torsa Kuria in na Mampangkorhon Hadoharon pakon hadearon i Tongah-tongah ni Gareja, Masyarakat ampa Negara”

I.     Praeludium
  1. Persiapan
  2. Penjelasan Liturgi:

Ibadah Ulang Tahun Pemuda sahalion ipatupa ibagas bingkai hasadaon bani perbedaan (Kebhinekaan).

  1. Prosesi mammasuki gareja (Prosesi boi ipungkah marhiteihon barisan ragam pakean adat, boi homa marhiteihon ragamni profesi, atap boi do homa marhiteihon ragam ni simbol, misalni gambar Garuda, Pnl na pataridahkon hasadaon ibagas perbedaan); ipilih ma salah sada. Barisan prosesi on ialo-alo tortor na ibobahon Pemuda. Hal on manggambarhon bahasa Pemuda Simalungun aima pelopor kebhinekaan.

Sanggah Prosesi, singer mandodingkon doding Hal No 450:1+3+5

  1. Sihol do uhurnami Tuhan

Pajumpah bohi pakonni Ham

:,: Sai roh ma Ham sonari Tuhan!

Podahi Ham hanami

  1. Ai Ham do na margogoh tongon.

Lao patorsahon hanami on.

:,: Sai roh ma Ham sonari Tuhan!

Podahi Ham hanami.

  1. Uhur sipambalosi Bamu.

Lao mangidangi kuria-Mu.

:,; Sai roh ma Ham sonari Tuhan!

Podahi Ham hanami.

 

 

II.  Kebaktian

 

  1. Votum- Introitus – Tonggo (Jongjong Kuria)

P     Ibagas goran ni Naibata Bapa, pakon Tuhan Jesus Kristus ampa Tonduy Napansing.

K    Sitompa langit pakon tanoh on

P.K Amen

P     Ale Tuhan Naibata, Bona pakon Ujung ni haganup, Roh do hanami nuan marsombah hu Bamu

K    Inang, Bapa, Namaposo pakon Dakdanak, manrogop do nuan  i lobeiMu, ale Tuhan anjaha Naibata na sintong.

P     Humbani haetek-etekonnami domma ibobai namatorasnami hanami roh anjaha marhaporsayaon  hu Bamu..

K    Sihol do hanami mangihutkon bokas ni sidea laho mananda bahasa Ham do Naibata ni haganup.

P     Patalar Ham ma diriMu na gok idop ni uhur, holong ampa hamuliaon in i  tongah-tongahnami.

K    Humbani na marragam marga, suku, ampa latar belakang roh do hanami hulobei-lobei-Mu.

P     Ai marragam do hita itompa, dos do holong ni Naibata hubani haganup. Ai sonon do holong ni uhur ni Naibata bani dunia on, pala do Anakni na sasada in iberehon, ase ulang magou ganup na porsaya Bani, tapi ase hagoluhan na sadokah ni dokahni bani. Tarpuji ma Ham sadokah ni dokahni. Haleluya … Haleluya … Haleluya …

P.K Mandodingkon songon (Haleluya);

Haleluya … Haleluya … Haleluya …

P     Martonggo ma hita:

Ham Tuhan Naibata Bapanami, pujionnami do Ham  halani bani panorang on, boi hanami martumpu  ijon mardingat partubuhni Anak-Mu Jesus Kristus na gabe Sipaluah bennami. Ibagas gok malas ni uhur do hanami, halani bani panorang on do homa ipestahon hanami na dob 64 tahun hajongjongan ni Seksi Pemuda i GKPS.  Ondos hu Bamu ma uhurnami, ase marhiteihon ibadah on boi hanami gabe saksi-Mu i tongah-tongah ni goluh on. Ibagas Goranni AnakMu Tuhan Jesus Kristus hanami martonggo. Amen

 

  1. Mandoding Hal. No. 316:1-3
  2. Sai puji ma Tuhanta in, ai tubuh Jesus in

Sai jalo ma Rajanta in, pasirsir ma uhurmu in

Mandoding puji ma, mandoding puji ma, mandoding puji Tuhan in.

2   Megah ganup dunia on, marsangap Tuhan in

Ganup mamuji Tuhan in, pakon ganup tinompa-Niin

Mandoding puji ma, mandoding puji ma, mandoding puji Tuhan in

  1. Sonang ma hita haganup,  ai sasap dousa in

Ipasu pasu do ganup,  ase maluah hita rup.

Humbai hamagouan, humbai hamagouan, humbai hamagouanta rup

 

 

  1. Hasasapan ni Dousa (Jongjong Kuria)

P     Roh ma hita hu lobeini Tuhan, roh ma hita hu-Bani ibagas hasadaon ampa sisada angkula ibagas Kristus i tongah-tongah ni dunia na marragam on. Gok ibagas habayakon do hita halani ragam ni perbedaan, tapi gati do homa perbedaan in gabe mamolah-molah hasadaonta. Buei do masa partinggilan halani pebedaan. Ase roh ma hita hubani Tuhan, ibagas unduk ni uhur.

J      Urupi Ham ma hanami ase manggoluh ibagas hasintonganMu.

P     Gati do maseda uhur-Mu Tuhan, halani tubuh ibahen hanami kebencian binahen ni perbedaan. Perbedaan gati gabe alasan parmusuhan. Gati do ihalupahon hanami bahasa na dos do hanami i lobei-lobei-Mu. Seng sitonggor jumbak Ham mangidah jolma.

J      Urupi Ham ma hanami ase manggoluh ibagas hasintonganMu.

P     Roh do partinggilan sanggah lang ianggap deba humbani pagori ni kuria in gabe bagian ni kuria-Mu, sanggah pagori ni kuria-Mu ianggap pendatang i tongah-tongah ni kuria in, sanggah pagori ni kuria-Mu lang humbani salah sada marga nami age pe bueinan do ia mambere uhurni hubani kuria in.

J      Urupi Ham ma hanami ase manggoluh ibagas hasintonganMu.

P     Sanggah maseda hauhuron na mangolati hita manghorjahon na madear, sanggah tarsinggung binehenni pebedaan gabe mangolati manghaholongi, sanggah ibahen borit ni uhur mambahen lambin mahol mengampuni. Sanggah warna kulit ampakon perbedaan na legan mambahen hita hurung bani biar ampa lang pag marsora, sanggah adong kuasa bani laho mangodoh-odoh na lang markuasa.

J      Urupi Ham ma hanami ase manggoluh ibagas hasintonganMu.

P     Hotop do hanami lang porsaya bani janji haluahon pakon pangkasomanionMu, mambahen hanami marpangunsandeian bani dirinami sandiri..

J      Ham Bapa, maidop ma uhurMu bennami. Ham ma na gabe hagoluhannami.

P.J  Mandodingkon Hal No 343 : 1+2

  1. Banggal tumang do holong-Mu, pabayu goluhkon

Na doyuk kahou magou ahu, hape maluah do

  1. Dob hutandai diringkin, megah ma uhurhin

Salosei hape utangkin, ibahen layak ni in

P     Tangar hita ma Hata ni Naibata bagah-bagah pasal hasasapan ni dousanta : “Anggo marparlahou hita ibagas haliharon, songon Ia ibagas na lihar in, saor do hita samah hita, anjaha ipaborsih daroh ni Jesus, Anak-Ni in do hita humbani sagala dousa.”

P     Hasangapon ma bani Naibata i babou!

J      Amen.                                                                                  (Jemaat hundul)

 

  1. Mandoding Hal No 235 : 1 – 3
  2. Na mungkab do surga, iben aha do

Ibaen na roh Jesus mangungkab bamu

Ibaen na roh Jesus mangungkab bamu

  1. Itaron dousamu, i Golgata in;

Ijin do salosei ganup utangmin

Ijin do salosei ganup utangmin

  1. Antong , O tonduy hu, bai Jesus ho roh;

Ai malas uhur-Ni manjalohon ho.

Ai malas uhur -Ni manjalohon ho .

 

  1. Refleksi HUT Pemuda: Manonun Hasadaon (Ibasahon piga-piga Pemuda)
  2. Tinompa ni Naibata do hita. Au, ham, ia, hita haganupan, na jinadihon marhitei tangan-Ni na gok hagogohon in do. Ibere do hubamu, hubangku, hubani, hubanta haganupan hosah hagoluhan. Dos do haganupan hita humbani orbukni tanoh; humbani na lang mararga ibahen gabe maharga i lobei-lobei-Ni. Itompa Naibata do hita songon rupa-Ni, songon rupa ni Naibata do hita itompa; dalahi pakon naboru do hita itompa. Ajari Ham ma au, hanami haganupan laho manandai Ham ampakon hasoman nami Tuhan.
  3. Ise do hasomanku? Lalab ma hupingkiri on. Sadokah on ibagas uhurhu Ise? Ise? Ise? Nuan dob hubogei bahasa sarupa do haganupan Ilobei-lobei-Ni Naibata, hugantih ma sungkun-sungkunhu gabe Ise do ahu bani hasoman?
  4. Sabonar sarupa do hita i lobei-Ni Tuhan. Lang adong ubahni Bani; barang binahen ni morga, suku, bangsa, jabatan, atap halani aha pe. Boi do marbeda sukunta, bahasanta, adatta, pakon na legan tene tapi i tongah-tongah ni kuria in sarupa do hita. Lang adong anak tiri anjaha na deba nari anak kandung.
  5. Sonari ahu domma simbur magodang. Isobut ma ahu Pemuda. Pemuda na gabe benteng. Benteng ni Gereja. Nuan 64 tahun ma Pemuda GKPS. Riap ma hita marhasadaon haganupan Pemuda ni GKPS tanpa memandang latar belakang, suku, ras, pakon bagi-bagei ni perbedaan na legan. Tonun hita ma hasadaon in. Ai Naibata pe iberehkon do Anak-Ni Jesus Kristus laho pasadahon haganup jolma, ase hadameion mangiankon dunia on.
  6. Pemuda lang pitah benteng ni gareja, dihut do benteng ni bangsanta. Pemuda GKPS maningon do gabe motor na manjaga hasadaon bani buei ni perbedaan na adong. Pemuda GKPS sihol ma gabe sitiruon pataridahkon kebhinekaan marhitei na mambangun jejaring na lobih banggal. Sada rumah do hita i Indonesia on, halani ai ningon jaga hita do hasadaonta i tongah-tongah ni bangsanta on.
  7. Hita haganupan hasoman Pemuda ni GKPS, jongjong ma hita, margondit hasintongan bani binongeita, marbaju bosi hapintoran, anjaha nahei marsipatu ringgas ni uhur, laho mangambilankon Ambilan Namadear, pardameian in. Pataridahkon hita ma semangat kepemudaan na tongtong sir-sir laho manghorjahon sagala hadearon.
  8. Sadarion aima ari ulang tahun Pemuda GKPS na pa-64 on. Ulang ma sangsi tapi torus ma maju ibagas haporsayaon. Totap ma marhaporsayaon janah marhaporusan hu Bani. Tadingkon ma hagolapan janah sondangkonma sondangni Kristus, sse puho haganupan jolma in marhitei haporsayaonmu. Selamat Ulang Tahun Pemuda GKPS. Naibata ma namamasu –masu.

 

  1. Mandoding Haleluya No. 446:1-2
  2. Sisada angkula do hita ganupan,

ragam ni pagori do hita tongon

Na sombuh bayak dos do in bani Tuhan,

seng dong ilioi isarihon do tong

Tuhanta do na gabe Hayu Anggur,

rantingni do hita on hajojor

Jolom ma Jesus ulang ham pandur,

ase tabun marbuah na ramos

 

 

  1. Tanda ni sisada angkula do hita,

rap marpangarapan bani goluh in

Nai do bani horja rap marsiurupan,

ulang dong na marsidalian ijin

Tuhanta do na gabe Hayu Anggur,

ranting-Ni do hita on hajojor

Jolom ma Jesus ulang ham pandur,

ase tabun marbuah na ramos

 

  1. Manaksihon haporsayaon

 

  1. Acara Khusus Pesta Ulang Tahun Pemuda
  2. Mambasa Tonah Pimpinan Pusat GKPS (Tonah terlampir)
  3. Puisi/Koor/Vocal Group Pemuda
  4. Tonggo Pangapition

 

  1. Mandoding Hal No. 36:1+3+5+7
  2. Puji hita ma Tuhanta, sai hu Bani ma uhurta

Ase mogah pandodingta, hita halak Kristen in.

  1. Botoh ma dear ni layak, ni Jahowa in na bayak

Iberehon age Anak bahen hagoluhan in.

  1. Domma binsar Panondang-Ni, hagolapan isondangi

Na masihol itambari, ipagoluh haganup

  1. Hu Bamu ma roh hanami mandodingkon dodingnami

rap ampa hasomannami ganup i surga in.

 

  1. Ambilan: Psalmen 98:2-9

 

  1. Galangan (Model A )

 

  1. Tonggo Galangan-Tonggo Riap-Pasu-Pasu (Model A)

 

III.             Postlidium

 

IV.              Acara Perayaan


 

 

 

 

 

 

 

 

SELAMAT HARI NATAL

DAN

HARI ULANG TAHUN PEMUDA GKPS

KE-

 

TUHAN MEMBERKATI


Artikel Lainnya:

Category: Tata Ibadah