Sibasaon Minggu, 4 September 2016 (XV dob Trinitatis)

Teks: Lukas 14:25-33;                                        Doding Haleluya No. 488:1-3

RESIKO GABE SUSIAN NI TUHAN JESUS

Parlobeini.

                Buku evanggelium Lukas on isurathon sahalak na margoran si Lukas, hasoman sapardalanan ni Apostel Paulus, na itujuhon hubani si Teopilus (Luk. 1:3). Ia si Lukas on aima sahalak dokter (tabib bnd Kolosse 4:14 ). Ia do homa na manurathon buku Lahoan ni Apostel. Age pe ia sahalak dokter, sipanambari, tapi ahli do ia homa age bani sejarah, termasuk sejarah ni Tuhan Jesus Kristus, na imulai humbani partubuh ni si Johannes Pandidi, tugah-tugah pasal partubuh ni Jesus das hubani Parnaik ni Tuhan Jesus (Luk. 24:50-53). Anjaha bani buku Lahoan ni Apostel isurathon do pasal parnaik ni Tuhan Jesus das hubani pardas ni si Paulus i huta Rom (Lah. 24:17-31). Evanggelium on isurathon si Lukas sekitar tahun 70 dob Kristus.

Hatoranganni.

                Halani pangajarion ampa horja halongangan na binahen ni Tuhan Jesus dompak na boritan bani ari Sabat (13:10-17; 14:1-6) gabe buei do halak na mangirikkon Tuhan Jesus. Bani panorang ai ma ipatugah Tuhan Jesus hubani jolma simbuei barang ise na sihol gabe susian ni Tuhan Jesus maningon sirsir do sidea manadingkon bapani, inangni, parinangonni, niombahni, saninani, botouni ronsi hosahni sandiri (ay. 26). Seng tarbahen atap ise pe humbani jolma simbuei in gabe susian ni Tuhan Jesus anggo seng itadingkon sidea haganup na dong bani sidea (ay. 33). Ambilan on lang imaksudkon ase magigi halak mangidah bapani, inangni, parinangonni, niombahni, saninani, botouni ampa hosahni sandiri. Lang! Lang adong maksud ni Tuhan Jesus ase magigi uhur ni susian-Ni dompak keluargani bei. Lang! Tapi na imaksudkon ni Tuhan Jesus aima barang ise na sihol mangirikkon Tuhan Jesus atap na sihol gabe susian-Ni, maningon sirsir do sidea “berkorban”. Mengorbankan hubunganni pakon sindohorni sandiri, demi mangirikkon Tuhan Jesus. Na isahapkon ni Tuhanta aima pasal prioritas hubungan. Sagala na mangirikkon Tuhan Jesus prioritasni aima parlobei hubungan ampa parsaoran pakon Tuhan Jesus daripada hubungan ampa parsaoran pakon sindohor ni sidea. Pengorbanan ai mencakup manadingkon “rasa nyaman” pakon keluarga dekatni. Arti ni ai, halak na gabe siirikkon Tuhan Jesus atap gabe susian ni Tuhan Jesus sirsir mandompakkon sagala resiko ampa konsekuensi halani mangirikkon Tuhan Jesus. Termasuk sirsir kehilangan hubungan pakon keluarga. Maluah humbani ketergantungan hubani pihak keluargani. Ketergantunganni aima dompak Tuhan Jesus.

                Mangihutkon para ahli tafsir Padan Nabaru, bani panorang ni ambilan on, Tuhan Jesus sanggah ibagas pardalanan manuju Jerusalem. Pardalanan manuju Jerusalem aima pardalan na sihol mandompakkon sitaronon ampa hamateian. Jadi mangirikkon Tuhan Jesus mararti sirsir manggoluh mandompakkon sitaronon ronsi hamateian (magouan hosah) songon na ialami ni Tuhan Jesus.

                Memang kecenderungan ni buei jolma aima sirsir mangirikkon Tuhan Jesus ibagas pangarapan ase manggoluh ibagas hasonangan, boi pamalumhon na boritan marhitei tanda-tanda halongangan (mukjizat). Boi mangan gratis tanpa marhorja.

                Mangirikkon Tuhan Jesus mararti do ai sirsir “mamorsan silangni” (ay. 27). Salib na imaksudkon ijon aima “resiko” atap “konsekuensi” halani mandalankon kewajiban ampa tanggung-jawab na dob iondoskon  Tuhan Jesus hu bani. Resiko na imaksudkon ijon boi do das hubani pangarsik-arsikon, hamaholon, rintangan, sitaronon ampa hamateian.

                Mangirikkon Tuhan Jesus lang sekedar ambisi na tanpa perhitungan na matang, na pitah emosional. Mangirikkon Tuhan Jesus aima hasil keputusan na dob matang, das hubani hasirsiron laho menanggung resiko berbahaya na mengancam kehidupan ni susian. In ma sada keputusan na lang boi mulak hu pudi, tapi maningon maju torus das hubani ujungni goluhni dengan segala resiko pakon konsekuensini. Ipausih Tuhan Jesus do kesiapan ni susian ai hubani sahalak na pajongjong menara pakon sahalak raja na sedang pasirsirhon diri laho mandompakhon parporangan. Iporluhon do perhitungan ampa persiapan na cermat paima mamutushon laho mamungkah mambangun ampa mamungkah marporang (ay. 28-31).

                Halani ai mangirikkon Tuhan Jesus mararti sirsir manadingkon “zona nyaman” itongah-tongah ni keluarga dekat anjaha sirsir masuk hubagas “zona berbahaya”, songon biri-biri na masuk hubagas liang ni sorigala. Sirsir mengorbankan goluhni ampa hosahni (nyawanya) demi tugas pelayanan na niondoskonni Naibata hu bani. Jadi sahalak susian ni Tuhan Jesus aima halak na “militant”, tegar bani haganup. Lang cengeng mandompakhon situasi ampa kondisi pelayanan na jinaloni humbani Naibata.

Hahonaanni.

                Bani deba halak adong do ibagas uhurni ra ia gabe halak Kristen aima ase marhasonangan, ase maluah humbani sitaronon, ase maluah humbani hadoyukon, ase manggoluh ibagas habayakon (dalam arti materi), ase marhasil janah sukses bani haganup horjani.

Ambilan on paingathon hita hubani kenyataan ni goluhta, goluh ni na porsaya in, na terbuka hubani sitaronon ampa hamateian.

                Adong do resiko ampa konsekuensi bani haganup horja pangidangionta. Resiko ampa konsekuensi ai boi das hubani na magouan hosah hita, songon na iparsilangkon. Tapi dingat hita ma hata ni Tuhanta na mangkatahon: “na magouan hosah halani Ahu, ai do na pagoluhkonsi” (Luk. 9:24; 17:33). Halani ai seng pala sihabiaranta sagala masam ni tantangan na idompakkon hita. Ai seng hamagouan ai banta, tapi hagoluhan do.

                Bani pesta olob-olob on patut do hita marmalas ni uhur halani age pe buei do na sihol mangagou goluhta ampa hosahta tongtong do hita iramoti janah ipargogohi Tuhanta mambahen boi hita manggoluh janah marpesta olob-olob das hubani sonari on.

                Halani ai patut do ipersiapkon hita pesta olob-olobta secara cermat atap secara matang. Ulang ma asal adong, ulang asal mardalan. Ulang sekedar adong. Tapi humbani gok ni uhurta, gok ni gogohta, gok ni tonduyta ma hita pasirsirhon olob-olobta hubani Naibata. Sintong-sintong ma humbani uhur parbagasta ma hita na marpesta olob-olob. Sintong-sintong ma humbani buah ni haporsayaonta, buah ni malas ni uhurta, buah ni holongta hubani Naibata na dob mangkaholongi hita. Amen.

Pdt Dr Jontor Situmorang

STT Abdi Sabda Medan


Artikel Lainnya:

Category: Ambilan