1. VOTUM – INTROITUS – TONGGO
P : Ibagas goran ni Naibata Bapa, pakon Tuhan Yesus Kristus
  ampa Tonduy Napansing,
K : Sitompa Langit pakon tanoh on.
  (Irik hujon, pilihon ma sada sibasaon marsibalos balosan ronsi martonggo, Sitompa Langit pakon tanoh on).
a. Psalmen 23 : 1 – 6.
P : Jahowa Siparmahan ahu.
K : Seng anjai hurangan ahu.
P : Ipatudu do ahu bani sampalan na mombur
K : Anjaha itogu-togu do ahu hu bah parsaranan.
P : Ipahisar do tonduyhu
K : Itogu do ahu bani dalan hapintoran halani Goranni in.
P : Age pe mardalan ahu bani lombang bagasni hagolapan, seng mabiar ahu.
K : Ai Ham do mangkasomani ahu, tungkotMu pakon simambuMu do na mangapohi ahu
P : Ham do mangidangi ahu i lobei ni munsuhku
K : Iminaki Ham do ulungku, anjaha sirnip do panginumanku
P : Dear layak ampa idop ni uhur do mangirik-irik ahu sadokah goluhku
K : Janah sihol do marianan ahu i rumah ni Jahowa sadokah ni dokahni.
P : Haleluya
P+K : (Mandodingkon) Haleluya, Haleluya, Haleluya.
K : Martonggo ma hita.
  Ham Jahowa Naibata… Amen.
b. Psalmen 103 : 1 – 6
P : Puji ma Jahowa ale tonduyhu
K : Anjaha humbani gok ni uhurhu mamuji Goranni Napansing in.
P : Puji ma Jahowa ale tonduyhu
K : Anjaha ulang ma halupahon ganup dear layakNi
P : Ia do na manasap sagala dousamu
K : Anjaha na pamalumkon sagala naboritmu
P : Napaluahkon goluhmu humbani hamagouan
K : Na mansortalihon bam dear layak ampa idopni uhur
P : Na pabosurhon sura-suramu marhitei na madear
K : Ase mulak bayu haposoonmu songon manuk-manuk nanggordaha
P : Jahowa na mambahen hapintoron
K : Anjaha na pasintongkon uhum bani halak na hona dorun
P : Haleluya
P+K : (Mandodingkon) Haleluya, Haleluya, Haleluya
K : Martonggo ma hita..
  Ham Tuhan Bapanami … Amen
c. Psalmen 93 : 1 – 5
P : Jahowa do Raja, marpaheian hamuliaon do Ia
K : Marpaheian anjaha margondithon hagogohon do Jahowa
P+K : Tongon ipajonam do dunia on, seng anjai dugur
P : Totap do paratasMu humbani na basaia
K : Humbani mula ni mulani do domma dong Ham
P : Marbanggal do bah, Ham Jahowa
K : Maling do pardosong ni bah, doras tumang do parhasakni
P : Gogohan marimbang parhasakni bah marbanggal
K : Gogohan marimbang pargilumbangni laut
P+K : Lobih markuasanan do Jahowa i nagori atas
P : HasaksianMu tongon do tarhatengerhon
K : Hapansingon do na patut bani rumahMu
P+K : Ham Jahowa ronsi sadokah ni dokahni
P : Haleluya
P+K : (Mandodingkon) Haleluya, Haleluya, Haleluya
P : Martonggo ma hita..
  Ham Jahowa, Naibata … Amen.
2. MANDODING
3. HASASAPAN NI DOUSA
P : Riap ma hita jongjong!
  Martonggo ma hita mansopotkon dousanta.

Ham Tuhan Naibata, ibagas toruh ni uhur roh do hanami hubamu mamboan hagalekon nami. Ai na mangaku do hanami, buei do lang ihorjahon hanami aha na patut sihorjaonkonnami. Halani ai patut do hanami hona ringisMu. Ham Tuhan, idop ma uhurMu bennami.

K : ( Mandodingkon Haleluya No. 238 : 1)
  Sai hulobeiMu Tuhanku, huuseihon uhurhon;

Sai pasiat Ham tonggoku, pakon ganup iluhkon.

P : Gati do hanami mangelak humbani tanggung-jawabnami,
  janah hurang barani do hanami mamorsan silang, halani mabiar hanami bani resiko. Bueinan do ipakei hanami panorang mamingkirhon dirinami sandiri marimbang mamingkirhon na hinarosuhkon ni uhurMu. Paluah Ham ma hanami humbani uhur biar pakon gobir. Ham Tuhan, idop ma uhurMu bennami.
K : ( Mandodingkon Haleluya No. 238 : 2)
  Husolsoli do uhurhu, na gok dousa in tongtong;

Ai buei ari-aringku, huparambur-ambur tong.

P : Sonari iboban hanami do haganup dousanami hulobeiMu,
  irik mangakuhon, na sirsir do hanami pabayuonMu, ase boi hanami mandalankon hataMu, janah bere Ham ma TonduyMu laho mambobai hanami bani goluhnami. Ham Tuhan, idop ma uhurMu bennami.
K : ( Mandodingkon Haleluya No. 238 : 3)
  Mangirikkon Ham Tuhanku, sai malas do uhurhin;

Sai totap ma in padanku! Amen, saud ma hata in!

P : Tangar hita ma Hata ni Naibata, bagah-bagah pasal hasasapan ni dousa.
  (basaon ma sada bagian/ ayat pasal Bagah-bagah hasasapan di dousa, lanjar irik ihatahon:)
  Hasangapon ma bani Naibata i babou
K : (Mandodingkon)  Amen, Amen, Amen.
4. MANDODING
5. MAMBASA SIBASAON
P : Tangar hita ma Hata ni Naibata na tarsurat bani …
  (Humbani sibasaon Ari/Minggu ai. Iujungi marhitei hata : )
  Amen. Martuah do na manangar Hata ni Naibata anjaha na maribagashonsi!
K : (Mandodingkon)  Amen, Amen, Amen.
6. MANDODING
7. MANAKSIHON HAPORSAYAAN/ ACARA KHUSUS
  P : Riap ma hita jongjong!
    Saksihon hita ma haporsayaonta in, songon na sinaksihon ni haganup halak na porsaya bani sab tanoh on!
    (Humbani : Apostolicum atap Niceanum atap Athanasianum).

(Apostolicum)

Ahu porsaya bani Naibata Bapa, Pargogoh na so tarimbang, na manompa langit pakon tanoh on.

Ahu porsaya bani Jesus Kristus, Anak ni Naibata na sasada in, in do Tuhanta, natinubuhkon ni si Maria sanggah lape haliaban, merhitei Tonduy Napansing. Na manaron na pangit, bani panorang ni si Pontius Latus, iparsilangkon, matei anjaha itanom, turun hu nagori toruh. Mulak manggoluh humbani na matei bani ari patoluhon. Naik hu Surga anjaha hundul i siamun ni Naibata Bapa, Prgogoh na so tarimbang in. Hunjai ma Ia mulak magira laho manguhumi halak na manggoluh pakon na dob matei.

Ahu porsaya bani Tonduy Napansing, bani Kuria parsadaan na mapansing in. Parsaoran ni saga na mapansing, bani hasasapan ni dousa, bani parpuhoon ni angkula, pakon bani hagoluhan na sadokah ni dokahni. Amen

    (Niceanum)

Ahu porsaya bani Naibata na sasada in,

Bapa Pargogoh na so tarimbang,

na manompa langit pakon tanoh

ronsi haganup na taridah ampa na so taridah.

Ahu porsaya bani Tuhan Jesus Kristus na sasada in,

Anak sasada ni Naibata,

na tinubuhkon ni Bapa in sanggah lape dong dunia on,

Naibata humbani Naibata,

na lihar humbani nalihar,

Naibata na sintong humbani Naibata na sintong.

Na tinubuhkon lang itompa,

Sisada hadirion pakon Bapa in,

MarhiteihonSi do ijadihon haganup.

Halani hita jolma pakon haluahonta do susur Ia hun nagori atas,

Na gabe daging marhitei Tonduy Napansing

humbani si Maria sanggah lape haliaban anjaha gabe jolma

Na iparsilangkon mangkopkop hita bani panorang ni si Pontius Latus.

Manaron na parngit, janah itanom.

Anjaha mulak manggoluh bani ari patoluhon mangihutkon Surat in,

Naik hu surga, anjaha hundul i siamun ni Bapa in,

Janah mulak magira marhasoman hasangapon

laho manguhumi halak na manggoluh pakon na dob matei.

Seng dong ujungni HarajaonNi.

Ahu porsaya bani Tonduy Napansing,

Tuhan janah Sipagoluh,

na roh humbani Bapa pakon Anak in,

Sisombahon janah Sipasangapon rap pakon Bapa ampa Anak in

Na dob marsahap marhitei nabi nabi.

Ahu porsaya bani Kuria na sasada in,

Kuria parsadaan na pansing anjaha apostolis.

Ahu manaksihon pandidion na sasada in,

bahen hasasapan ni dousa.

Anjaha mangarap do ahu bani parpuhoon ni sagala na dob matei,

Pakon bani Hagoluhan simagira.

Amen

    (Athanasianum)

Barang ise na sintong-sintong sihol maluah,

parlobei tang siporlunan dong bani ai ma:

Manjolom haporsayaon Kristen parsadaan in.

Atap ise na mansedahon janah na so sintong manramothon ai,

pasti ma magou sadokah ni dokahni.

On do haporasayaon Kristen parsadaan in:

Ipasangap hita Naibata na Sada in na ibagas Hasitolusadaon,

janah Hasitolusadaon in ibagas Hasadaonni.

Anjaha seng na iagu hita Hadirion in,

barang mambagi Hadirionni hita ijin.

Legan do Hadirion ni Bapa.

legan Anak,

legan Tonduy Napansing.

Tapi Bapa, Anak pakon Tonduy Napansing

sada do Hanaibataon ni sidea,

dos Hasangaponni,

dos Hatunggungonni na manongtong ai.

Atap sonaha Bapa in,

sonai do Anak in,

janah sonai do Tonduy Napansing.

Seng na itompa Bapa in,

seng na itompa Anak in,

seng na itompa Tonduy Napansing.

Manongtong do Bapa in,

manongtong  do Anak in,

manongtong do Tonduy Napansing.

Age pe sonai seng dong tolu Na Manongtong,

tapi sada do Na Manongtong,

Sonai do seng tolu Na so tinompa in,

Seng tolu na so tarsibar in,

tapi sada do na so tinompa

janah sada do Na so tarsibar in.

Pargogoh na so tarimbang do Bapa in,

Pargogoh na so tarimbang do Anak in,

Pargogoh na so tarimbang do Tonduy Napansing.

Nai pe seng tolu Pargogoh na so tarimbang,

tapi sada do Pargogoh na so tarimbang,

Ase Bapa in do Naibata,

Anak in do Naibata,

Tonduy Napansing in do Naibata.

Nai pe seng dong tolu Naibata,

tapi sada do Naibata.

Bapa in do Tuhan

Anak in do Tuhan

Tonduy Napansing do Tuhan.

Nai pe seng dong tolu Tuhan,

tapi sada do Tuhan.

Ai songon pangojur ni hasintongan Kristen in banta

ningon mangakui :

ganup Hadirion do Naibata janah Tuhan,

sonai do panlarang ni agama Kristen parsadaan in banta

manobut tolu Naibata pakon tolu Tuhan.

Seng dong na manjadihon Bapa in

barang manompaSi

atap manubuhkonSi

Anak in ai ma humbani Bapa in tumang hansa,

sedo na ijadihon barang na itompa,

tapi na itubuhkon do.

Tonduy Napansing ai ma na roh humbani Bapa pakon Anak,

sedo na ijadihon

barang na itompa

atap na itubuhkon.

Ase sada do Bapa, seng tolu Bapa,

sada do Anak, seng tolu Anak,

sada do Tonduy Napansing, seng tolu Tonduy Napansing.

Janah ibagas Hasitolusadaon on,

seng dong silobeian atap sipudian,

seng dong sibanggalan atap sietekan.

Tapi na tolu ai rap manongtong do janah dos banggalni,

ase songon na dob sinobut nongkan,

sipasangapon do Hasitolusadaon in

ibagas Hasadaon in, janah Hasadaon in ibagas Hasitolusadaon.

Atap ise nuan na sihol maluah,

sonai ma pandapotni pasal hasitolusadaon in.

Na porlu ope bani hagoluhan sisadiokahni dokahni,

ai ma na mangkaporsayai humbani gok ni uhur,

na dob gabe jolma Tuhanta Jesus Kristus.

Ase, haporsayaon na sintong, ai ma

anggo ihaporsayai janah isaksihon hita:

Tuhanta Jesus Kristus, Anak ni Naibata,

ai ma Naibata anjaha Jolma.

Naibata do Ia na itubuhkon humbani Hadirion ni Bapa in

paima tombei dunia on.

Jolma do Ia na itubuhkon humbani Hadirion ni Inangni i dunia on.

Naibata na gokan dear, Jolma na gokan dear

na martonduy pakon na marangkula jolma.

Dos do Ia pakon Bapa in

mangihutkon Ha-Naibataon,

etekan marimbang Bapa in

mangihutkon Hajolmaon

Ia do Naibata janah Jolma

age pe sonai seng dua Kristus,

tapi sada do.

Sada, tapi seng marhiteihon ni na salih Ha-Naibataon humbani daging,

tapi marhitei na ijalo Naibata do Hadirion ni jolma.

Sada, tapi seng marhiteihon na iagu Hadirion in,

tapi sada Hadirion do.

Ai songon tonduy pakon daging gabe jolma,

sonai do Naibata pakon Jolma gabe sada Kristus.

Na manaron bahen haluahonta,

turun hu nagori toruh,

mulak manggoluh bani ari patoluhon humbani na matei.

Naik hu surga,

hundul i siamun ni Bapa,

hunjai ma Ia mulak magira,

laho manguhumi halak na manggoluh pakon na dob matei.

Haganupan jolma maningon puho bani parrohNi magira

ibagas angkulani bei,

mampartanggung jawabhon pambahenanni bei.

Janah sagala na manghorjahon na madear

masuk ma huhagoluhan na so ra bois,

tapi sihorjahon  na masambor

masuk hubagas apuy na so ra miloh.

Ai ma haporsayaon Kristen parsadaan in,

barang ise na so bujur

janah so totap mangkaporsayai ai

seng anjai maluah.

Amen.

8. MANDODING
9. TONGGO SYAFAAT PAKON TONGGO RIAP
  P : Riap ma hita jongjong!
    Martonggo ma hita.

(Manonggohon na porlu/ khusus)

Amen.

Ham Bapanami na i nagori atas. Sai napapansing ma Goranmu!

  K : Ajari Ham ma hanami laho papansing GoranMu,
    marhiteihon nasirsir hanami manangihon pakon mangkorjahon HataMu ibagas goluh nami.
  P : Sai roh ma harajaonMu!
    Sai saud ma harosuh ni uhurMu i nagori tongah songon na i nagori atas!
  K : TonduyMu Napansing ma marianan bennami,
    ase ipargogohi hanami laho pataridahkon tanda-tanda ni harajaonMu pakon pasaudkon harosuh ni uhurMu i tanoh on, marhitei pambalosion ampa pangabak na talup i lobeiMu.
  P : Bere Ham ma bannami sadarion hagoluhan ari-ari.
  K : Ajari Ham ma hanami, ase lambin mangidah,
    mananda janah mambotoh, n pitah Ham do harohan hagoluhan nami, ase ihamalaskon hanami buei ni silayak-layakMu, na dob binereMu pakon na sihol bereonMu ope bennami.
  P : Sasap Ham ma dousanami songon panasapnami
    bani dousa ni hasoman na mardousa dompak hanami.
  K : Ajari Ham ma hanami mangkaholongi hasoman nami,
    songon pangkaholongiMu bennami, ase na madear ibahen hanami balos ni na jahat, lang marsubil, lang mardomdom, lang marmapas ni uhur hanami hubani hasoman. Pargogohi Ham ma hanami, ase tongtong mambalosi Ham janah manghaholongi hasoman
  P : Ulang hanami bobai Ham huparlajouan.
    Paluah Ham ma hanami humbani pangagou.
  K : Ham Tuhan Naibata, parorot anjaha parmudu-mudu
    Ham ma hanami laho manlembangi dousa pakon siding ni sibolis, ase monang hanami mangimbang pangagou in.
  P : Ai Ham do simada harajaon, pakon hagogohon
    ampa hasangapon sadokah ni dokahni. Amen
  K : (Mandodingkon)  Amen, Amen, Amen.
10. MANDODING
11. AMBILAN
12. MANGGALANG
  P : a. Paima ipatumpu galangan, lobei ibasahon Hata
  ni Naibata na gabe onjolan laho manggalang
    b. Martonggo
  K : Mandodingkon doding galangan.
13. TONGGO GALANGAN – PANUTUP – PASU-PASU
P : Tonggo na mardomu bani goran ni Minggu/ Pesta.
  (Padaskon hata pasu-pasu)
K : (Mandodingkon) Amen, Amen, Amen.