Ambilan Minggu, 4 September 2016 (XV dob Trinitatis)

Teks: 5 Musa 30:15-20                                     Doding Haleluya No. 264: 1-3

ULANG SALAH PILIH!

Parlobeini.

       Ambilan on aima sebahagian humbani hata partadingan ni si Musa dompak bangsa Israel sanggah na marsaran sidea i pamah Moab. Domma iahapkon si Musa seng na boi be ia riap pakon bangsani ai. Ai olat ni na mangkawahkon tanoh Kanaan, in do hansa ilopas Naibata Jahowa ia. Ai domma itodoh Naibata Jahowa si Josua laho mambobai bangsa Israel na laho manoruskon pardalanan laho mamasuki tanoh bagah-bagah in. Sihol uhur ni si Musa laho mambere panotap hubani bangsani ai, ase totap sidea satia dompak Naibata Jahowa sanggah na dob iiankon sidea holi tanoh bagah-bagah ai. Ai buei do naibata-naibata  (dewa-dewi) ijai na isombah halak Kanaan. Ulang holi das taruyun bangsa Israel mangirikkon halak Kanaan.

Hatoranganni.

      Adong do sada hata na mangkatahon: “Hidup ini adalah sebuah pilihan!” On ma homa na ipadas ni si Musa dompak bangsa Israel: “domma hupatuduhkon bamu sadari on hagoluhan pakon hatuahon, hamateian pakon hamagouan” (ay. 15). Adong dua pilihan na maningon siputuskonon ni bangsa ai ibagas uhurni: “hagoluhan pakon hatuahon” atap “hamateian pakon hamagouan”. Anggo “hagoluhan pakon hatuahon” do na ipilih bangsa ai, mararti maningon haholongan ni sidea ma Jahowa Naibata. Maningon marparlahou sidea ibagas dalan ni Jahowa anjaha iramothon sidea titah-Ni, aturan-Ni pakon uhum ni Jahowa. Gabe manggoluh ma sidea anjaha lambin roh bueini. Ai pasu-pasuon ni Jahowa Naibata ma sidea bani tanoh siparayakon ni sidea na gabe parbagianan ni sidea. Mangkaholongi Jahowa Naibata mararti homa manangihon sora-Ni (mendengarkan suara-Nya). Ai anggo ra sidea manangihon sora ni Jahowa Naibata, gabe marlobih-lobih ma sidea itumpaki Jahowa Naibata bani haganup horja ni tanganni, bani boras ni boltokni, bani panggargar ni pinahanni pakon bani gogoh ni tanohni (30: 9). Hata Heber na ipakei ijon untuk “manangihon” aimai: shama (shema: [m;v’:  ipakei 1050 hali bani Padan Nabasaia), na mararti:

Manangihon (Hear), manangihon sada-sada halak na marsahap hu
bani (1 Musa 3:10; Hes. 3:7),

– Mambogei janah satuju (Listen, agree), (Am. 5:23; 1 Musa 27:5),

– Mambere uhur ampa pingkiran (Heed), memusatkan perhatian (1
Musa 17:20),

– Mambalosi (Obey: patuh/taat), (2 Musa 24:7; 2 Raja 14:11),

– Mangarusi (understand), (1 Musa 11:7).

   Jadi “manangihon sora-Ni” mararti: mandompakhon Jahowa, mambere uhur ampa pingkiran humbani gok ni uhur. Satuju laho mambalosi anjaha mangarusi hata-Ni. Hata “shema Israel” aima na gabe inti pokok ni haporsayaon (credo iman) ni halak Israel (5 Musa 6:4-5). Tanda ni na dob manangihon ampa mambalosi hata ni Jahowa aima sirsir mangkaholongi Jahowa Naibata humbani sagala uhurni pakon humbani sagala tonduyni pakon humbani sagala gogohni. Manangihon sora ni Jahowa mararti mandompakhon Jahowa, satuju hubani haganup hata-Ni, mambere uhur atap memusatkan perhatian hubani hata ni Jahowa, pambalosi hubani hata-Ni Jahowa, mangarusi hata-Ni ai.

         Hata na paduahon na ipakei si Musa aima: uledabeqa (hq’b.d”l.W) na mararti: tungkot atap tongkat, longkot marsijoloman hubani, berpegang teguh, “berpaut pada-Nya”, lang urah hallus humbani tanganni (Job 19:20; Ps. 102:6; 137:6; 2 Sam 23:10). Halak na ra manangihon sora ni Naibata Jahowa, longkot do uhurni hubani Naibata, anjaha seng ra ia hallus humbani Naibata, totap longkot hubani Naibata, anjaha marsijoloman na toguh hu Bani.

     Sobalikni, anggo seng ra sidea manangihon hata ni Naibata Jahowa, gabe sirang uhurni humbani Naibata, marbalik uhurni, ra ia ajar-ajaran ni naibata na legan anjaha mambalosi ai, maningon magou tumang ma sidea. Seng anjai dokah sidea manggoluh i tanoh siparayakon ni sidea (ay. 18). Ondoskonon ni Naibata ma sidea hubani bangsa na legan. Gabe bangsa taban-taban (tawanan) ma sidea. Gabe jabolon atap budak ni bangsa na legan ma sidea. Ai sogop ma hamateian pakon hamagouan hubani sidea. Mangonai ma papa-papa (kutuk) hubani sidea (ay. 19).

       Halani ai nini si Musa do dompak bangsani ai: “pilih ma hagoluhan, ase manggoluh ham pakon ginomparmu” (ay. 19). Ai hagoluhan do ai bani sidea anjaha haganjangon ni umur. Boi ma sidea manggoluh bani tanoh na dob binulawankon ni Jahowa hubani ompung ni sidea: si Abraham, si Isak pakon si Jakob (ay. 20).

       Age pe adong do bani hita jolma na ginoran “kehendak bebas” (free will) lang mintor pilihonta homa hamateian ampa hamagouan. Ai anggo ai do ipilih hita doskon jolma na oto ampa na so maruhur do hita ijai. Domma ipatuduhkon si Musa hubanta na gabe sipilihonta, hape ipilih hita tong na legan na lang iharosuhkon Naibata Jahowa, ai lang doskon jolma na oto ma hita ijai ai? Halani ai ulang das salah mamilih hita ibagas goluhta on. Pilih hita ma tong “hagoluhan pakon hatuahon” (kehidupan dan keberuntungan). Tadingkon hita ma “hamateian pakon hamagouan”.

 

 

Hahonaanni.

     Domma 113 tahun Ambilan Na Madear in ondos hu tanoh Simalungun. Domma buei halak Simalungun pakon halak na legan na manjalo Ambilan Na Madear in na gabe halak na pentar anjaha na maruhur. Domma pandei hita mamilih na patut sipilihonta. Ai ma dalan hagoluhan pakon hatuahon. Ai ma goluh na tongtong mangkaholongi Naibata Jahowa humbani gok ni uhurni, gok ni tonduyni, gok ni gogohni. Sada ma lah pilih hita, aima Naibata Jahowa. Ulang be adong na legan atap naibata na legan ibagas goluhta. Hatahon hita ma pengakuanta songon pengakuan ni si Josua: “Tapi anggo ahu pakon hasomanku sarumah, Jahowa do sibalosannami!” (Jos. 24:15b).

       Halani ai, patut do hita gok malas ni uhur bani pesta olob-olob na ipestahon hita itongah-tongah ni keluarga, kuria age resortta pe. Ai domma ondos bani goluhta sipilihonta aima haluahon, hagoluhan pakon hatuahon. In ma hata ni Naibata Jahowa na dob ipatalar marhitei Anak-Ni Tuhanta Jesus Kristus.

       Lang tarbahen lang, bani sada panorang iujungi Naibata Jahowa ma homa goluhta bani panorang na so binotohta. Sonaha, pori iujungi Naibata Jahowa ma goluhmu, domma nani adong na gabe partadinganmu hubani niombahmu? Aha do partadingan na pinasirsirmu hubani niombahmu? Haluahon, hagoluhan pakon hatuahon do? Atap hamateian pakon hamagouan do? Damei, holong ampa malas ni uhur bani niombah (ampa hasoman) do? Atap partinggilan ampa pusok ni uhur bani niombah ampa hasoman do? Halani ai, sanggah sompat ope, pasirsir ham na gabe partadinganmu hubani niombahmu (ginomparmu), hasomanmu, bangsamu, ampa kuriamu. Amen.

Pdt Dr Jontor Situmorang

STT Abdi Sabda Medan


Artikel Lainnya:

Category: Ambilan